„Родова еднаквост значи да им се дадат повеќе права на жените одошто на мажите“ или „Феминизмот е насочен против мажите“ – ваквите тврдења се примери на дезинформации што можат да поттикнат предрасуди и негативни ставови кон родовата еднаквост и феминизмот како движење за еднакви права.
Платформата genderai.org нуди можност за проверка на слични тврдења со помош на ВИ чет-ботови развиени специјално за препознавање и спротивставување на дезинформации поврзани со родот во дигиталниот простор.
Станува збор за иницијатива во рамки на проектот „Чет-ботови со вештачка интелигенција за борба против МДМ и заштита на родовата еднаквост“, што го спроведува Здружението „Акција Здруженска“ во соработка со дел од наставниот кадар од Институтот за родови студии при Филозофскиот факултет во Скопје.
Против дезинформации и страв од „родот“
„Платформата произлезе од потребата за развој на локални, иновативни и ефикасни алатки за справување со штетите предизвикани од манипулации и лажни информации пласирани од анти-родови движења. Тие ја девалвираа темата на родова еднаквост, ги сатанизираа феминистичките активистки и создадоа страв од самиот поим ‘род’, особено кај граѓани кои претходно никогаш не чуле за него“, вели Марија Савовска, извршна директорка на „Акција Здруженска“.
Првично алатките биле наменети за студентската популација, но со цел нивна поширока употреба. Платформата веќе се користи и како едукативен ресурс за локални женски организации, жени и девојки од рурални средини и други заедници кои ги поддржува здружението. Во следните фази, се планира посеопфатна едукација и понатамошен развој на алатките.
Поддршка за учење, истражување и критичко размислување
Чет-ботовите функционираат преку анализа на текстови, детектирање на неточни информации и објаснување зошто одредена содржина е проблематична, со што корисниците добиваат можност за критичка проценка на изворите.
„Студентите најчесто ги користат овие алатки за практична поддршка при подготовка на семинарски, учење и истражување. Ботовите помагаат во објаснување на теоретски поими, давање дефиниции, историски контексти и пристап до релевантни извори“, вели Мартина Лозаноска, асистентка на Институтот за родови студии.
Таа додава дека алатките се покажале како особено корисни за разбирање на теми како родова еднаквост, дискриминација, интерсекционалност и медиумска писменост. Студентите ги доживуваат како логични, достапни и прецизни, а дел од нив истакнале дека со помош на чет-ботовите полесно ги совладале посложените поими.
Поширока примена и идни подобрувања
Покрај студентите, ВИ чет-ботовите ги користат и наставници, истражувачи, активисти и други граѓани заинтересирани за примената на технологијата во својата работа. Алатките се користат за анализа на говор на омраза, медиумски содржини и општествени трендови, како и при подготовка на извештаи и едукативни материјали.
„Ботовите се лесни за користење, не бараат техничко знаење и можат да бидат ресурс за самоедукација за пошироката јавност, вклучувајќи наставници и активисти“, вели Лозаноска.
Таа најавува дека следната цел е да се унапреди квалитетот на комуникацијата – со побрзи и посоодветни одговори, подлабока содржина и попрецизно разбирање на сложени теми.
Имплементаторите на проектот предвидуваат и развој на мултимодални способности – анализа на слики и аудио, подобро контекстуално разбирање и транспарентност во начинот на кој ВИ ботовите доаѓаат до своите одговори.
