Жителите на Вевчани, Новата година ја дочекаа во мрак, смрзнати и гневни на надлежните, кои со денови ги оставија без електрична енергија на температура од -10 Целзиусови степени.

Тие бараат итно да им се реши проблемот бидејќи трпат големи штети, им се расипува белата техника, немаат телефони, секојдневно купуваат свеќи и батерии. Вевчанци најавуваат групна тужба против ЕВН, ЕЛЕМ и МЕПСО, а можни се и протести ако проблемот не биде итно решен.

Големи штети претрпеа и локалните угистителски објекти и туристичките капацитети бидејќи за Нова година рестораните не работеа, се откажаа аранжманите, пропаднаа сите резервации во мотелите и приватното сместување.

Градоначалникот на општина Вевчани, Цветомир Угриноски, вели дека вложува максимални напори да помогне во надминувањето на ситуацијата бидејќи се наближува одржувањето на Вевчанскиот василичарски карневал.

– Целосно сме посветени на заокружување на програмата на претстојниот Вевчански василичарки карневал, кога очекуваме по 50.000 посетители дневно. Оваа ситуација нè снајде во најнеповолен момент, се надевам дека бргу ќе се надмине – вели Угриноски.

Покрај Вевчани, без струја се и многу села во Струшко, во Долни Дримкол и Малесија, како и Подгорци, Октиси, Боровец и Јабланица.

Без елекрична енергија се речиси сите планиски села во општина Дебрца, кои се отсечени и завеани со снег.