Турбините на ветерниците во ветерниот парк во Богданци се производство на „Сименс“ Данска и се вбројуваат меѓу најдобрите во својата класа. Паркот, со своите 16 турбини, има инсталирана моќност од 36,8 MW и годишно произведува околу 100 GWh природно одржлива енергија, што е доволно за снабдување на околу 60.000 граѓани, намалувајќи ја зависноста од фосилните горива и придонесувајќи за намалување на емисиите на CO2. Ова било истакнато денеска при посетата на надлежните од Министерството за енергетика, рударство и минерални суровини, на ветерниот парк во Богданци, соопштија оттаму.
Ветерниците го користат ветерот како погонска сила за производство на електрична енергија. Инсталираната моќност на секоја од турбините е 2.3 MW, висината на столбот изнесува 80 метри, а дијаметарот на елисата изнесува 93 метри. Втората фаза од овој проект вклучува поставување на нови 4 ветерни турбини и таа ќе додаде дополнителни 13,2 до 15 MW капацитет. Оваа фаза е дел од пошироката стратегија на владата да го зголеми учеството на обновливите извори на енергија до 45% од вкупното производство до 2030 година.
На денешната обиколка во Богданци присуствуваа министерката Сања Божиновска и претставници од АД ЕСМ.
„Ветерните паркови не се само економски исплатливи, туку и еколошки одговорни. Тие се клучот кон одржлива иднина и економски раст кој не ги загрозува ресурсите на идните генерации“, истакна министерката Божиновска.
