Со денешната одлука за повлекување на обвинението за случајот „Пуч“, СЈО потврди е партиски разгранок на СДСМ/Сорос, изјави денеска на прес-конференција актуелниот пратеник на ВМРО-ДПМНЕ и поранешен претседател на Собранието, Трајко Вељаноски.
Тој истакна дека Јанева „не е обвинител кој работи независно туку по наредбите на лидерот на СДСМ, Зоран Заев, и на нарачателите од странство“.
– Од денеска Јанева и Специјалното јавно обвинителство влегуваат во ново руво, а во одбрана на криминалот. Со денешната одлука Јанева застана зад Заев и зад Верушевски, кои дури се обидоа да ја заобиколат волјата на граѓаните и без избори да се дограбат до власта со објавување на креирани и монтирани материјали – рече Вељаноски.
Со денешната одлука, додаде Вељаноски, „СЈО целосно се делегитимира и се откажа од основната функција заради која е формирано“.
– Тоа потврди дека неговата задача не е расветлување на скандалот со прислушувањето, туку вклучување во политичката битка. Немаме дилеми дека СЈО е партиски разгранок на СДСМ – рече Вељаноски.
