Трајко Вељаноски, претседател на Собранието на Република Македонија, денеска се сретна со Роберто Батели, специјалниот претставник на Парламентарното собрание на ОБСЕ за Југоисточна Европа, и со амбасадорот Андреас Нотеле, специјален претставник на Парламентарното собрание на ОБСЕ во Виена.
Како што соопштија од кабинетот на Вељаноски, на средбата се разговарало за актуелните случувања во државата, можните исходи од моменталните политички случувања, како и за тековните активности на Собранието и за посветеноста на Македонија во остварување на реформите за што поскоро почнување на пристапните преговори за влез во Европката унија и во НАТО.
Претседателот Вељаноски го поздравил постигнатиот договор помеѓу лидерите на политичките партии за надминување на несогласувањата и изразил надеж дека наскоро Собранието ќе почне да функционира во полн состав бидејќи работата на Собранието и неговиот придонес во функционирањето на една држава се од исклучително значење.
Соговорниците се согласиле дека политичката дебата треба да се одвива во Собранието бидејќи собраниската говорница е најдобар инструмент преку кој може да се изразат мислењата и ставовите.
