Еврокомесарот за проширувае Оливер Вархеји порача дека преговорите за кревање на бугарското вето за почеток на преговорите со Северна Македонија се во ќорсокак, пренесува Бугарското национално радио (БНР) од Брисел.
„Тоа за што сум на јасно е дека во однос на Софија сме целосно влезени во ќорсокак. Тоа не ме прави многу среќен бидејќи го минував секој втор четврток во Бугарија. Изгледа дека внатрешната политика е способна да ја поткопа довербата во ЕУ. Затоа во оваа фаза не мислам дека воопшто може да зборуваме за каква било преговарачка рамка“, рече Вархеји во Брисел.
Среде сериозна политичка криза во Бугарија, со напуштањето на владејачката коалиција од страна на ИТН, партијата на шоуменот Слави Трифонов, и гласањето доверба за актуелната влада на Кирил Петков што ќе се одржи в среда, мали се шансите да се случи кревање на бугарското вето за почеток на пристапните преговори на земјава за зачленување во ЕУ.
