„Ако не ти се допаѓа пораката убиј го гласникот“, беше одговорот на белгискиот олеснувач, Питер Ванхауте, на новинарско прашање за коментар за вчерашниот говор на претседателот на ВМРО-ДПМНЕ, Никола Груевски, во кој беше споменато и неговото име.
Инаку, членовите на политичките партии претставници на работните групи попладнево повторно се сретнаа во Клубот на пратеници за да разговараат за реформите во медиумите и за методологијата за прочистување на избирачкиот список.
Ванхауте пред почетокот на средбата изјави дека денеска ќе се разгледуваат нови предлози за Законот за медиуми.
– Денеска имаме состанок на кој ќе разгледуваме нови предлози за медиумите и се надевам дека ќе постигнеме напредок. Ова се предлози што ги даде ВМРО-ДПМНЕ, а се одговор на претходни предлози што ги даде СДСМ. Сè уште не сум ги видел предлозите и не знам што содржат, ќе бидат изненадување за сите – рече Ванхауте.