Очигледно нема договор, ситуацијата во моментов е целосно блокирана и сега спроведуваме билатерални консултации сo партиите на ниво на меѓународна заедница за да видиме како да продолжиме во наредните часови, изјави вечерва белгискиот посредник Питер Ванхауте, пренесува „Телма“.
Според неговите очекувања, можно е околу 20 часот вечерва преговарачките групи на четирите партии потписнички на Договорот од Пржино да одржат нов состанок, но, како што вели Ванхауте, и тоа не е сигурно и допрва ќе се види што ќе се случува.
– Очигледно има различни ставови за повеќе прашања. Главните проблеми се околу составот на советот на Агенцијата за медиуми и програмскиот совет на МРТВ – рече Ванхауте пред Клубот на пратеници.
Крајниот рок до кога партиите треба да постигнат договор за медиумите истекува вечерва.
