Амбасадорката на Кралството Белгија, Аник ван Калстер, вечерва на белгискиот експерт и олеснувач во работните групи, Питер Ванхауте, му го врачи одликувањето „Офицер во кралскиот ред“.
Како што рече амбасадорката, ова одликување го добиваат експерти и политичари што се заслужни за развој на демократијата и на човековите права.
Примајќи го одликувањето, Ванхауте рече дека му е драго што вечерва е меѓу пријатели што го делат истото мислење со него.
– Денеска во Белгија, за жал, видовме дека борбата за демократија никогаш не завршува. Драго ми е што денеска сум тука, на ова место, каде што почна мојата кариера на Балканот. Јас верувам дека има иднина за оваа земја, како во ЕУ, така и во НАТО. Но, сите заедно мора да се борите за тоа и да не заборавите дека Европа е тука да ве поддржи. Лично јас ќе се вратам по неколку месеци и ќе продолжам да ве поддржувам како и досега во борбата за демократија, за животна средина и за сè друго – рече Ванхауте.
Белгискиот олеснувач учествуваше во преговорите по црниот понеделник и по кризата по 24 декември 2012 година, а ги предводеше и работните групи за спроведување на Договорот од Пржино.
Сепак, во последно време предизвика контроверзни реакции со своите твитови со мачки, преку кои изнесуваше лични ставови актуелните состојби во земјава.
Од овие причини и поради неговите ставови, владејачката ВМРО-ДПМНЕ реши да не учествува на преговори на кој ќе присуствува и Ванхауте.
Пред почетокот на настанот, присутните со едноминутен молк им оддадоа почит на загинатите во денешните терористички напади во Брисел.
