В понеделник започнува тринаесеттото Патувачко кино на „МакеДокс“

фото: „МакеДокс“

Започнува тринаесеттото патување на Патувачкото кино на „МакеДокс“, кое ќе се одржи во два дела. Првиот дел од 18 до 24 јули ќе се одржи во Струмичкиот регион, додека вториот дел во септември ќе се одржи во Преспанскиот регион.

Од „МакеДокс“ соопштија дека проекциите почнуваат во понеделник во селото Пиперево, по што Патувачкото кино ќе продолжи и во другите села во Струмичкиот регион со следниов распоред: 19 јули – Вељуса, 21 јули – Моноспитово, 22 јули – Босилово и 23 јули – Габрово.

Сите проекции се бесплатни и ќе започнат во 21 часот.

„Магаренцето ќе носи приказни, но и ќе собира. Ќе собира приказни од правнуците на комитите на југоистокот чии прадедовци ги предизвикале светските медиуми да пишуваат за Македонија со месеци уште во првата година од 20. век. Ќе собираме приказни за мравјалниците, блатото, ендемската флора, но и за одсекот на македонскиот петвековен крик – приказната за првото модерно киднапирање во светот“, велат од „МакеДокс“.

Во рамки на Патувачкото кино ќе се одржи и првата сесија од четвртата генерација на школата за млади документаристи – „ДокуНикулци“. Тие на Патувачкото кино ќе се запознаат со документарниот филм, ќе развиваат свои приказни, ќе работат на нив во текот на годината и ќе ги прикажат на следното издание на фестивалот „МакеДокс“.

Патувачкото кино е поддржано од Агенцијата за филм на Република Северна Македонија, Националната фондација за демократија од Вашингтон и општините Струмица, Босилово и Василево.