Пратеникот Горан Мисовски на денешната седница на Комисијата за оценување на основаноста на предлогот за покренување постапка за утврдување одговорност на претседателот Ѓорге Иванов, ги повика пратениците од ВМРО-ДПМНЕ да расправаат за мотивите заради кои Иванов ги донел одлуките за аболиција. На ова, пратениците од владејачката партија му одговорија дека немаат мандат за тоа.

Според Мисовски, причините за тоа се вмешаноста на речиси сите членови од извршниот комитет на ВМРО-ДПМНЕ во злосторничкото здружение за кое зборувало СЈО, како и во опструкцијата на работата на ова обвинителство.

– Од денот на формирање на ВМРО, по 25 години независност, првпат партијата добива етикета на злосторничко здружување, од што сигурно се срамите. Иванов од Сараево ни испрати порака: „Немојте да крадете ќебапи и ајвар по подрумите, ќе добиете етикета дека сте сите криминалци, крадете многу пари и ќе добиете епитет дека сте политичари, а политичарите не треба да одат во затвор“ – истакна Мисоски.

Претседателот на комисијата, Зоран Илијоски од ВМРО-ДПМНЕ, му реплицираше на Мисовски, велејќи му дека кoи биле мотивите, што мислел Иванов и дали некој го натерал, не е работа на комисијата, тука дека таа треба да утврди дали има одговорност и дали ги прекршил Уставот и законите.

Потоа пратениците се вратија на дискусијата од вчера за тоа кој закон за помилување е на сила и дали членот 11 е на сила или не. Пратениците од ВМРО-ДПМНЕ тврдеа дека спорниот член постои, опозицијата тврдеше дека не постои и потсети дека оваа дилема може да се расчисти единствено со автентично толкување на законот. Тоа го побара СДСМ, но иницијативата сè уште е во фиока кај претседателот на Собранието, Трајко Вељаноски.

В понеделник комисијата треба да подготви извештај и предлог-одлука за тоа дали барањето за импичмент е издржано или не. Потоа за одлуката ќе се расправа на пленарна собраниска седница, а за да помине предлогот за одговорност на Иванов, за него треба да гласаат 82 пратеници.