Со завршувањето на мандатот на судијката Вангелина Маркудова, Уставниот суд од денеска останува со само шест судии од предвидените девет.
Последната седница на којашто присуствуваше судијката Маркудова се одржа во средата на 7 декември и тогаш завршија нејзините работни обврски во Уставниот суд.
„Последна иницијатива по којшто Маркудова работеше и ја реферираше на седницата е за Законот за плата и другите надоместоци на избрани и именувани лица“, извести Уставниот суд.
Ваквото намалување на бројноста на судиите секако не оди во корист во поглед на авторитетноста на институцијата и на одлуките што ги донесува.
Вангелина Маркудова работи активно во правосудството од 1984 година, почнувајќи како приправник и стручен соработник во општинскиот суд Гевгелија во кој во 1986 година е избрана за судија. Во 1996 година е избрана за судија во Основниот Суд Скопје I во којшто од 2007 до 2013 постапува во одделението за организиран криминал и корупција. На 21 ноември 2013 година е избрана за уставна судијка како предлог на Судскиот совет, нејзиниот мандат почнува да тече од 7 декември 2013 и заврши на 7 декември 2022 година.
