Бројот на убиени новинари и медиумски работници е зголемен за 50 отсто во текот на 2022 година, објави УНЕСКО. Дури 86 новинари и медиумски работници биле убиени лани, при што најопасни делови од светот, според бројот на убиства, биле Латинска Америка и Карибите.
Организацијата за наука образование и култура на ОН, УНЕСКО има мандат да обезбеди слобода на изразување и безбедност на новинарите на глобално ниво, а агенцијата на ОН наведе дека нејзините податоци ги нагласуваат сериозните ризици и ранливост со кои се соочуваат новинарите во својата работа.
„По неколку години постојан пад, наглиот пораст на бројот на убиени новинари во 2022 година е алармантен“, вели генералната директорка на УНЕСКО Одри Азуле.
Најопасен регион за новинарите била Латинска Америка и Карибите, каде што лани се регистрирани 44 убиства на медиумски работници. Во Азија и Пацификот имало 16 убиства, додека во 2022 година дури 11 убиства биле забележани во Источна Европа. По земји, најголем број на убиства во светот имало во Мексико (19), по што следат Украина (10) и Хаити (9).
