Украинските сили ја започнаа контраофанзивата на окупираните територии од руските сили на југот на земјата, јавува Ројтерс. Светската агенција посочува дека Украина зборува за контраофанзива на југот на Украина веќе два месеци, додека паралелно речиси секојдневно ракетираше позиции на руската војска и инфраструктурни објекти на окупираните територии.
„Денеска ние започнавме офанзивни дејствија во повеќе правци, вклучувајќи го и Херсонскиот регион“, ја пренесе украинскиот јавен радиодифузер Суспилне изјавата на портпаролот на украинската јужна воена команда, Наталија Хумењук.
Хумењук додаде дека неодамнешните украински ракетирања без сомнежи го ослабиле непријателот, информирајќи дека повеќе од 10 локации со муниција на руската војска биле погодени изминатава недела, заедно со линиите за снабдување. Сепак, таа не даде конкретни детали во врска со новата контраофанзива, посочувајќи дека било која операција е потребно да се одвива стихијно.
Укринформ денеска информира дека украинските сили успеале да ги пробијат првите линии на фронтот на руската војска во Херсонскиот регион. Минатата ноќ и денеска украинската војска ракетира позиции во Херсон, Олешки, Нова Каховка, Антонивка, Љубумивка и Берислав.
Во меѓувреме, тимот на Меѓународната агенција за атомска енергија (МААЕ) при ОН денеска го започна своето патување до нуклеарната електрана во Запорожје, која е окупирана од руските сили. Долгоочекуваната мисија ја предводи нејзиниот директор, Рафаел Гроси, а целта на мисијата е да ги испита клучните безбедносни системи во нуклеарната електрана, јавува АП.
За да се избегне нуклеарна катастрофа, генералниот директор на Меѓународната агенција за атомска енергија Рафаел Гроси со месеци бараше пристап до нуклеарната електрана во Запорожје, која е најголема во Европа.
Гроси на Твитер напиша дека дошол денот за тргнување на мисијата на пат, а објави и фотографија од себеси со 13-те други експерти. Очекувањата се мисијата на МААЕ да пристигне во нуклеарната електрана во Запорожје подоцна оваа недела, но засега нема попрецизна временска рамка за нејзиното работење или дополнителни детали.
