Гувернерот на Луганската област, Серхи Хајдај објави дека украинските војници ќе мора да се повлечат од градот Северодонецк за да заземат нови, утврдени позиции во натамошните борби, јавува Укринформ. Тој воедно напиша дека во предградијата на соседниот град Лисичанск веќе влегле руските сили, но засега се сопрени да напредуваат подлабоко во градот.
„Русите речиси целосно го уништија Северодонецк, целата клучна инфраструктура е збришана, 90 отсто од градот е оштетен, а 80 отсто од домовите ќе мора да бидат уништени бидејќи нема да може да се обноват“, изјави тој.
Инаку, Лисичанск е последниот поголем град во Луганската област кој е под контрола на украинските сили. Гардијан пишува дека обидот за освојување на градот од руските сили изминатово деноноќие бил одбиен, при што загинале двајца цивили. Сепак, украинските власти тврдат дека со приближувањето на руските сили сега целиот град ќе може да биде под артилериски напад.
Гардијан ги пренесува информациите на украинските власти дека руската војска се обидува да го опколи Лисичанск, но и тврдењата на руската страна дека веќе успеале да ги пресечат врските за снабдување на украинските безбедносни сили за овој град.
Покрај интензивните борби во Донбас, Укринформ ги пренесува информациите на украинските власти дека руските сили во изминатово деноноќие извршиле артилериски напади врз населени места во регионите Суми, Запорожје и Харкив на североистокот и истокот на Украина.
