Американскиот секретар за одбрана Лојд Остин изјави дека тој очекува од Украина да започне пролетна офанзива против Русија и ги повика земјите-членки на НАТО да ја интензивираат својата поддршка за Украина, пренесува Би-би-си. Остин говореше на прес-конференција што се одржа на првиот ден од состанокот на министрите за одбрана на земјите-членки на НАТО во Брисел.
Генералниот секретар на НАТО, Јенс Столтенберг во своето обраќање предупреди на недостиг од муниција на линијата на фронтот во Украина и додаде дека на оваа земја ѝ треба сето она што било ветено од нејзините сојузници. Столтенберг предупреди дека рускиот претседател Владимир Путин се подготвува за „повеќе војна“, а не за мир. Генералниот секретар на НАТО дополни и дека украинскиот конфликт прераснува во логистичка војна.
Сепак, во однос на украинското барање за испорака на воени авиони, Столтенберг дека оваа тема е на дневен ред пред земјите-членки на НАТО, но „не е најитното прашање сега“. Наместо ова, Јенс Столтенберг побара од сојузниците да го испорачаат сето она што било ветено, односно оклопните возила, вклучувајќи ги германските Мардерс, американските Бредли и борбените тенкови Леопард.
Британскиот министер за одбрана, Бен Валас во денешното интервју за Би-би-си изјави дека Обединетото Кралство наскоро нема да испраќа воени авиони во Украина, но и дека фокусот ќе биде да се осигура дека официјален Кијив ќе може да се брани на долг рок.
Ваквите одговори од клучните земји-членки на НАТО доаѓаат по барањето на Украина за воени авиони, кое на состанокот на НАТО го афирмираше украинскиот министер за одбрана Олексиј Резников.
Украинскиот претседател Володимир Зеленски пак изјави дека Русија брза да постигне колку што може повеќе со својата најнова офанзива пред официјален Кијив и неговите сојузници да соберат сила.
„Затоа брзината е од суштинско значење. Брзина во сè – донесување одлуки, извршување на одлуки, испорака на материјали, обука. Брзината ги спасува животите на луѓето, брзината ја враќа безбедноста“, рече Зеленски во своето последно видео обраќање до украинската јавност.
