Управата за јавни приходи (УЈП), на својот Фејсбук профил информира дека на граѓани им биле испраќани СМС пораки во кои се бара тие да извршат задолжителна пријава на лажна веб-страница https: ujp-gov.mk/potvrda.
„Никако да не ја отворате оваа лажна веб-страница бидејќи од вас се бара да пополните полиња со вашите лични податоци, податоци од платежна картичка, како и да прикачите фотографија од вашата лична карта. Споделувањето на вашите лични податоци преку оваа лажна веб-страница може да предизвика нивна злоупотреба. Веб-страницата не e во сопственост на Управата за јавни приходи“, предупредуваат во УЈП.
Испраќачот на пораките, велат оттаму, се обидува да ги злоупотреби името и логото на УЈП и да ги доведе во заблуда граѓаните, да споделуваат лични податоци и на тој начин да се изложат на ризик и можна злоупотреба.
„Управата за јавни приходи ги презема сите неопходни активности за справување со оваа состојба“, додаваат оттаму.
