Министерството за внатрешни работи во криминалистичка истрага под кодното име „Брана“ разбила повеќечлена криминална група која од јули минатата година до јуни годинава продавала марихуана, кокаин и екстази во земјава.
Како што соопшти денеска МВР, тројца од осомничените биле идентификувани како организатори на групата, а двајца дејствувале како посредници. Полицијата извршила претреси во нивните домови, каде, како што информираат оттаму, биле пронајдени и предадени на вештачење, растителни и прашкасти материи, мобилни телефони и извесна сума на пари.
Од МВР велат дека поради карактеристиките на криминалната група, за која постојат основи на сомневања за коруптивно влијание во „одредени структури на полицијата и судството“, надлежните институции ќе продолжат со истрагата заради обезбедување дополнителни докази и откривање на нови членови.
Денеска МВР до Основното јавно обвинителство за гонење организиран криминал и коруцпија, во врска со акцијата, ќе поднесе кривична пријава против седум лица, кои се товарат за неовластено производство и пуштање во промет на наркотични дроги, психотропни супстанци и прекурсори.
Од МВР информираат дека петмина од осомничените се приведени, едно лице против кое е поднесена кривична пријава е веќе во притвор, а по едно сè уште се трага.
„Досега во рамки на криминалистичко истражување „Брана“, во текот на 2015 и 2016 година, кривично пријавени и лишени од слобода се вкупно 30 лица, при што запленети се повеќе од 4 килограми марихуана, семки од растението канабис сатива, 75 таблети екстази, повеќе од 9 грама кокаин, таблета МДМА и 1,6 милилитри масло од хашиш за што се поднесени 10 кривични пријави. Притоа досега е пријавен полициски инспектор, јавен обвинител и директор на општа болница. Криминалната група дејствувала на територијата на Свети Николе, Штип, Кочани, Битола, Гостивар и Скопје“, стои во соопштението на МВР.
