Министерството за внатрешни работи информираше дека уапсиле 17-годишен малолетник од Куманово кој се сомничи дека ноќта на 28.11.2024 година ја откорнал таблата на српскиот конзулат во Куманово. Полицијата сподели и снимка од безбедносна камера на која се гледа дека младото момче што ја откорнува таблата на рамената го носи знамето на Албанија. Повеќе мејнстрим медиуми меѓу кои и телевизии со национална концесија ова го сметаа за доволен доказ дека момчето има албанско етничко потекло. Полицијата не објави име и презиме, ниту повеќе детали за 17-годишникот. На објавената снимка неговиот лик е замаглен.
Од СВР Куманово само посочуваат оти вчера на 29.11.2024 година кај нив било пријавено дека е откорната таблата на канцеларијата на Конзулатот на Република Србија во Република Северна Македонија.
„Веднаш по добиената пријава, во координација со ОЈО Куманово, полициски службеници од СВР Куманово презедоа мерки и активности и го расчистија кривичното дело. Малолетникот е приведен во полициска станица и по документирање на случајот СВР Куманово ќе поднесе кривична пријава по член 319 од КЗ до ОЈО Куманово“, се вели во краткото соопштение кое е придружено со снимка од безбедносната камера.
На снимката се гледа како на 28.11.2024 година во 23:08 часот момчето поминува покрај српскиот конзулат зборувајќи на телефон. Снимката е едитирана, односно недостигаат околу 40-ина секунди откако момчето го одминува конзулатот во 23:08 часот и 39 секунди, па потоа продолжува во 23:09 часот и 17 секунди кога момчето се враќа и ја откорнува таблата по повеќе безуспешни обиди. Потоа заминува со нејзе и ја фрла на улица.
