Десетици вработени кои модерираат содржини и го следат говорот на омраза се отпуштени од Твитер во најновото кратење на работните места од оваа компанија, пренесува Гардијан. Станува збор за вработени со седиште во Даблин и Сингапур, кои биле дел од тимот за доверба и безбедност задолжен за меѓународна модерација на содржината, како и единицата која го надгледува говорот на омраза и вознемирувањето.
Овој потег ја зголемува долгогодишната загриженост дека новиот сопственик Илон Маск ја укинува регулативата на компанијата за содржина со омраза и дезинформации.
Со Маск на чело, Твитер претрпе криза во односите со јавноста со отпуштања, оставки, пад на приходите, неволни огласувачи и тужби за неплатени сметки.
Последниот круг на намалувања погоди десетина луѓе, а меѓу нив беа Аналуиса Домингез, виш директор за политика на приходи на Твитер и Нур Азхар Бин Ајоб, неодамна ангажираниот шеф за интегритет на страницата за азиско-пацифичкиот регион.
Отпуштени се и вработени задолжени за политиката на дезинформации на Твитер, глобалните апели и државните медиуми.
Шефот за доверба и безбедност на Твитер, Ела Ирвин, потврди за Блумберг дека неколку членови на тимовите се отстранети, додека негираше дека намалувањата се насочени кон други области.
Ирвин рече дека Твитер ќе продолжи да има раководител на политиката за приходи и шеф на азиско-пацифичкиот регион за доверба и безбедност. Таа, исто така, рече дека компанијата го зголемила персоналот во одделот за жалби.
Гардијан пишува дека истражувачите и поборниците за човекови права изминатиов период открија навреди, реторика со омраза и злонамерни содржини, чиј број се зголемува откако Твитер прејде во сопственост на Маск. Додека забранетите сметки на екстремно десничарски реакционери беа вратени, неколку истакнати новинари што ги следат технолошките иновации се најдоа накратко суспендирани од Твитер минатиот месец.
