Претседателот Ѓорге Иванов денеска се сретна со претседателот на Европскиот совет, Доналд Туск. Како што соопштуваат од кабинетот на Иванов, на средбата се разговарало за напорите за постигнување заедничко европско решение за бегалската и мигрантска криза. Иванов го информирал Туск за најновите состојби, како и за мерките и за активностите што Македонија ги презема за справување со бегалската криза.
„Бараме и очекуваме решение од Европскиот совет и немаме никаков интерес целиот товар да падне само на Грција, но нема да дозволиме да се реализираат еднострани решенија што ќе бидат на наша штета. Воедно, Македонија ќе соработува со јужениот сосед за надминување на предизвиците од мигрантската криза“, истакнал Иванов.
На средбата, претседателот предупредил и дека се зголемуваат обидите за насилно влегување во Македонија, употребата на фалсификувани пасоши и документи на Фронтекс, како и насилството врз безбедносните сили на граничната линија, со што се доведува во прашање не само националната безбедност, туку и регионалната стабилност.
Иванов бил дециден дека во случај на затворање на балканскиот мигрантски коридор, Македонија ќе ги преземе сите мерки и активности за хуман третман на мигрантите кои транзитираат, како и за заштита на државните граници и за зачувување на националната безбедност и дека нема да се дозволи на територија на Македонија да се изградат бегалски кампови.
„Македонија досега покажа дека е подготвена на сите сценарија и нема да дозволиме зголемување на безбедносните ризици од мигрантската криза“, порачал Иванов.
Како што пишува во соопштението од кабинетот на претседателот, соговорниците се согласиле дека е потребна итна координирана и синхронизирана акција на сите засегнати држави и усогласено решение.
Туск пред почетокот на средбата со Иванов порача дека ЕУ ја разбира тешката ситуација со која се соочуваат властите во Скопје и дека не може и не треба да нè остави да се справуваме сами со неа.
