Турски воени авиони денеска нападнале 45 цели во северниот сириски реон Африн, соопшти армијата и додаде дека копнените сили навлегуваат во зоната која е под контрола на курдската милиција поддржана од САД.

Во соопштението се информира дека 32 авиони нанеле удари против засолништа, скривници, магацини за оружје и борбени позиции на курдските Сили за заштита на народот, во вториот ден од операцијата „Маслиново гранче“. Сите авиони по нападите се вратиле во базата, истакна генералштабот на турската армија.

Во исто време, турските медиуми јавија дека турската армија и Слободната сириска армија навлегле пет километри внатре на територијата на сириската област Африн.

Почетокот на копнената операција „Маслиново гранче“ за чистење на Африн од борците на сириските Сили за заштита на народот и ПКК, кои се сметаат за терористички групи кои и се закануваат на територијалната целост на Турција, беше означен денеска во 11 часот по локално време, еден ден по воздушните напади на турски воени авиони врз позиции на противникот.

Турската армија заедно со силите на опозициската Слободна сириска армија извршија масовен напад врз Африн, навлегувајќи од точката Ѓулбаба, во граничната област Килис.

Според турски известувачи од областа, каде што е формиран прес центар за новинари, во операцијата учествуваат тенкови, оклопни возила, пешадија и командоси од специјални сили. Во операцијата учествувале и 72 турски воени авиони Ф-16, а поразени биле 153 цели на противникот.