Портпаролот на СВР од Охрид, Стефан Димоски, денеска изнесе повеќе детали за вчерашната трагична сообраќајка кај селото Белица, која однесе во смрт три млади животи, а двајца се потешко и полесно повредени.
Во тешката сообраќајна незгода, која се случи на регионалниот пат Кичево – Демир Хисар, во близина на селото Белица, животите ги загубија Реџеп М. (58), неговата сопруга Санија М. (47) и нивниот син Рејхан М. (25), сите од кичевското село Лисичани. Тие се наоѓале во патничко моторно возило марка „фолксваген поло“ со кичевски регистарски таблици.
Во сообраќајната незгода, со тешки телесни повреди се здобил Ф.И. (31) од Прилеп, кој по укажаната медицинска помош во болницата во Кичево е префрлен во општата болница во Прилеп. Полесни повреди добила Ј.К. (30) од Прилеп, која по укажаната медицинска помош во болницата во Кичево е пуштена на домашно лекување.
Сообраќајната незгода се случила при разминување на патничко моторно возило марка „мерцедес“, управувано од Ф.И., кое се движело во правец Битола – Кичево, со возилото „фолксваген поло“, управувано од сега починатиот Реџеп М., кое се движело од Кичево кон Битола и на критичното место во близина на селото Белица.
Во моментот на разминувањето, возилото „мерцедес“ со предниот лев дел, удрило во предниот дел од возилото „фолксваген поло“. Ова возило, од силината на ударот, излетало на десната страна надвор од коловозот и се превртело на покрив во одводен канал.
На местото на тешката сообраќајна незгода, извршен е увид во присуство на јавен обвинител од основниот суд во Кичево, како и полициски екипи од полициска станица за безбедност во патниот сообраќај од Кичево.
