Опасна станува ситуацијата во општина Новаци откако водите на Црна Река поплавија два помали моста пред РЕК Битола. Патот е отсечен, а постои опасност да биде однесен од силните води, предупредуваат од Општина Новаци.
Во селото Новаци веќе се евакуирани неколку семејства кои живеат на почетокот од селото и се сместени во простории на Општината.
– Веќе не стравуваме за нивите, туку за животот на нашите сограѓани. Водите на Црна стануваат сè поопасни и постои голема опасност поради надојдената вода која наликува на планински брзак да се сруши мостот и патот на река Црна, кој поминува низ Новаци и води до РЕК. Доколку дојде до тоа, цело село Новаци и најголемиот производител на електрична енергија во земјава ќе останат отсечени – вели градоначалникот Лазар Котевски.
Градоначалникот Котевски, Општината, кризниот штаб и локалното население цела ноќ се на терен. Се копаат насипи за да се спречи надојдената река да не го полави целото село. Водата стаса и до локалното училиште, па утрово децата се пуштени дома.
– Ситуацијата е навистина алармантна поради надојдената вода од браната кај РЕК, која се скина околу 100 метри, скинат е и деветтиот канал во должина од 100 метри, така што целата вода се слева наваму. Веќе почнаа да се поплавуваат куќите на почетокот на селото, поплавено е и повеќенаменското игралиште, а водата е дојдена речиси до училиштето. Затоа ги пуштивме децата да си одат дома и прекината е наставата заради нивна безбедност. Ситуацијата ќе беше далеку покритична доколку не преземевме превентивни мерки уште пред неколку дена – вели Котевски.
Ситуацијата будно се следи, на критичното место кај регионалниот пат поставен е мерач на водостојот за да се следи нивото на Црна, а забрането е и движењето на тешки товарни моторни возила.
А.Б.
