Индексот на трошоците за живот во октомври 2015 година, во споредба со истиот период лани, бележи намалување за 0,5 отсто, а индексот на цените на мало бележи намалување од 1,2 отсто.
Индексот на трошоците за живот во октомври 2015 година е на исто ниво како и претходниот месец, но е забележано движење во подгрупите.
Пораст е забележан кај шеќерот, џемот, медот, чоколадата и кај кондиторските производи за 1,3 отсто, конзервираната риба за 1,1 отсто, тестенините и другите неспоменати прехранбени производи за 1 процент, мастите и маснотиите за 0,9 отсто, свежото млеко за 0,4 отсто, преработките од млеко за 0,3 отсто, месото и полутрајните колбасичарски производи за 0,2 отсто.
Исто така, пораст на индексот на трошоците за живот во октомври 2015 година, во споредба со претходниот месец, е забележан кај обувките за 4 проценти, цврстите горива и кај мебелот за 3 проценти, гасот за домаќинствата и течните горива за домаќинствата за 2,6 проценти, лековите за 2,1 отсто, туристичките пакет-аранжмани за 1,9 отсто, накитот и часовниците за 0,7 отсто, друго образование за 0,6 отсто, течните горива и мазива за 0,4 отсто, услугите за одржување и за поправки на станот за 0,3 отсто.
Намалување на индексите е забележано кај свежото овошје за 8,7 проценти, свежиот зеленчук за 0,8 отсто и кај сувото овошје за 0,5 отсто. Исто така, намалување на индексите на трошоците за живот е забележано кај авионскиот превоз на патници за 11,4 проценти, велосипедите за 1,6 отсто, облеката за 0,9 отсто, средствата за чистење и за одржување на станот за 0,7 отсто, информатичката опрема за 0,6 отсто, материјали за одржување и за поправки на станот за 0,5 отсто.