Благо зголемување на трошоците на животот, но и опаѓање на цените на мало се регистрирани во најновите податоци на Државниот завод за статистика за септември 2019 година.

Индексот на трошоците на животот во изминатиов месец, во споредба со септември 2018 година, забележал пораст од 0,3 отсто, но истиот бележи намалување од 0,6 отсто во однос на август 2019 година.

Индексот на цените на мало во изминатиот месец бележи намалување од 0,7 отсто во споредба со идентичниот период лани, како и опаѓање од 1,4 отсто во однос на август 2019 година.

Намалување на индексите на трошоците на животот во септември 2019 година, во споредба со претходниот месец, е забележано кај свежиот и разладениот зеленчук освен компирот и другите коренести плодови за 3,9 отсто, свежото и разладеното овошје за 2,8 отсто, сувото овошје и јаткастите производи за 1,9 отсто и другите прехранбени производи за 1,7 отсто.

Исто така, најзабележително намалување на индексите на трошоците на животот во изминатиов септември е забележано и кај авионскиот превоз на патници за 20,2 отсто, туристичките пакет – аранжмани за 10,5 отсто, услугите за сместување за 6,5 отсто и гасот за домаќинствата за 2,3 отсто.

Пораст на индексот на трошоците на животот во септември 2019 година, во споредба со претходниот месец, е забележан кај сирењето и урдата за 1,3 отсто, свежата и ладена риба за 0,6 отсто, другите пекарски производи за 0,5 отсто, месото за 0,4 отсто и јогуртот за 0,3 отсто. Во септември 2019 година, најголем пораст на индексите на трошоците на животот исто така е забележан и кај фотографската и кинематографската опрема и оптичките инструменти за 6,2 отсто и информатичката опрема за 1,7 отсто.