Откако Државната изборна комисија ги потврди освоените мандати во првиот круг на локалните избори, јасно е дека петмина досегашни пратеници во Собранието на Република Македонија ќе заминат од таа функција и ќе станат градоначалници.
На нивните функции ќе стапат нови имиња, од кои три се жени.
Така, во првиот круг на локалните избори, градоначалник на Скопје стана Петре Шилегов од СДСМ, неговиот колега Стефан Богоев, кој е градоначалник на општина Карпош, Сашо Поцков, градоначалник на Гевгелија, Максим Димитриевски, градоначалник на Куманово, и Коста Јаневски, кој стана градоначалник на Струмица.
Според кандидатските листи на СДСМ за парламентарните избори, се очекува нивните пратенички функции да ги преземат Анета Симеска-Димоска, Лидија Тасевска, Костадин Костадинов, Ристе Ташев и Татијана Лалческа.
Во трка за градоначалник сè уште се пратениците Јохан Тарчуловски, Благој Бочварски, Курто Дудуш, Бетиан Китев, Зијадин Села и Зеќирија Ибрахими, па можно е од кандидатските листи за предвремените парламентарни избори што се одржаа во декември лани, во пратеничките клупи да влезат уште неколку нови имиња.
Претходно осум пратеника го напуштија Собранието поради оставка или стапување на министерски функции. Тоа се Никола Тодоров од ВМРО-ДПМНЕ, Рената Дескоска, Дамјан Манчевски, Оливер Спасовски, Љупчо Николовски, Зоран Заев, Радмила Шекеринска од СДСМ и Биљал Касами од Беса. Со исклучок на првиот и на последниот, кои поднесоа оставка поради лични причини, односно поради градоначалничка кандидатура, другите станаа премиер и министри во владата.
Сепак, престанокот на мандатите на новите градоначалници што победија во првиот круг на локалните избори ќе мора да почека до завршувањето на вториот круг, кога претседателот на Собранието ќе свика седница на која ќе се констатира завршувањето на пратеничките мандати.
