Министерката за труд и социјална политика, Јованка Тренчевска денеска се сретна со амбасадорката на Обединетото Кралство (ОК) во земјава, Рејчел Галовеј. Теми на разговор беa досегашните и тековни активности на Министерството и соработката и поддршката од страна на Британската амбасада, соопшти министерството.
На средбата се разговарало за процесот на деинституционализација на децата без родители и лицата со попреченост. Министерката информирала дека повеќе ниту едно дете под 18 години не е сместено во институција, туку во групен дом со 24 часовна грижа од стручен тим. Тече и процесот на преселба на лицата со попреченост, преку отворање на нови групни домови, во услови налик семејните.
Тренчевска рече дека во насока на обезбедување на поголема поддршка на згрижувачките семејства и подигнување на свеста за нивното значење се и отворањето на двата Центри за поддршка на згрижувачки семејства во Скопје и Битола, со поддршка од страна на УНИЦЕФ.
На средбата се разговарало и за воспоставувањето и развојот на социјалните сервиси на локално ниво. Министерката Тренчевска информирала дека министерството работи и на изработка на Национален регистар на лица со попреченост, како и на Закон за вработување на лица со попреченост, кој ќе понуди нова перспектива и професионална рехабилитација.
Тренчевска на средбата со амбасадорката на ОК, Рејчел Галовеј, посочила дека родовата еднаквост е високо на агендата на приоритети на МТСП. Информирала дека, Стратегијата за родова еднаквост наскоро влегува во собраниска процедура, а министерството активно работи и на нов Закон за родова еднаквост, кој до крајот на следниот месец ќе ја има драфт верзијата, за која ќе биде отворена широка јавна дебата. Подобрување на механизмите за родова еднаквост на национално и на локално ниво, како и ефикасно функционирање на Ресурсниот центар за креирање на политики и родово одговорно буџетирање се очекувањата од ова законско решение.
Амбасадорката Галовеј ја потврдила поддршката за процесот на деинституционализација и дизајнирање на услуги засновани на потребите на заедницата, а се со цел децата и семејствата да ја добијат поддршката која им е потребна. Продолжува и поддршката на политиките во детската заштита односно детските градинки и зајакнување на капацитетите на вработените во нив, преку заедничките проекти кои се спроведуваат.
Двете соговорнички изразиле подготвеност за продолжување на добрата соработка и пријателство меѓу двете држави и институционална соработка и продолжување на тековните и идни заеднички проекти.
