Претседателот на САД Доналд Трамп со неколку твитови денеска предизвика вистинска сензација во јавноста, откако порача дека „можеби е подобро“ да се укинат брифинзите за новинарите во Белата куќа, а потоа му се закани на сменетиот директор на ФБИ, Џејмс Коми да не искажува негативни ставови за претседателот во јавноста, споменувајќи „снимки“.
„Бидејќи сум многу активен претседател а многу работи се случуваат, не е можно моите соработници да застанат на говорница и да бидат совршено точни. Можеби е најдобро да се укинат сите идни брифинзи за новинарите и во интерес на вистината да се даваат писмени одговори???“, напиша Трамп на Твитер.
As a very active President with lots of things happening, it is not possible for my surrogates to stand at podium with perfect accuracy!….
— Donald J. Trump (@realDonaldTrump) May 12, 2017
…Maybe the best thing to do would be to cancel all future "press briefings" and hand out written responses for the sake of accuracy???
— Donald J. Trump (@realDonaldTrump) May 12, 2017
Овој потег е испровоциран од непријатностите со кои се соочи Белата куќа поради различните објаснувања за причините Трамп да го смени директорот на ФБИ, Џејмс Коми.
Откако Трамп го смени Коми, неговите советници изјавија дека тоа го направил по препорака на заменик министерот за правда Род Розенстајн. Потоа и самиот Трамп и неговите советници истакнаа дека тој планирал да го отстрани Коми од функцијата уште пред да ја добие препораката.
По првиот твит, уследи уште еден во кој Трамп го предупредува Коми навестувајќи дека е можно да има снимки од нивните разговори.
„Коми подобро нека се надева дека нема „снимки“ од нашите разговори пред да почне да дава информации во медиумите“, напиша Трамп.
James Comey better hope that there are no "tapes" of our conversations before he starts leaking to the press!
— Donald J. Trump (@realDonaldTrump) May 12, 2017
