Цитирајќи анонимни извори, американскиот дневен весник „Вашингтон пост“ објави дека новоизбраниот претседател на САД, Доналд Трамп зборувал со претседателот на Руската Федерација Владимир Путин. Според весникот, Трамп го советувал рускиот претседател да не ја ескалира војната во Украина и го потсетил на значителното воено присуство на Вашингтон во Европа. Разговорот подоцна беше демантиран од страна на официјалните државни извори во Кремљ.
Наводно, двајцата претседатели разговарале за крај на војната во Украина, при што Трамп изразил интерес за повеќе последователни разговори за „наскоро решавање на војната во Украина“.
Во својата претседателска кампања, Трамп изјави дека веднаш ќе стави крај на војната во Украина, иако не понуди детали за тоа како има намера да го стори тоа. Тој потоа сигнализираше дека ќе поддржи договор со кој Русија ќе задржи одредена освоена територија, а за време на разговорот со Путин наводно накратко го покренал и тоа прашање.
Додека стратегијата на претседателот Џо Бајден и потпретседателката Камала Харис во однос на Украина беше предвидлива, портпаролот на Путин, Дмитри Песков изјави: „Трамп е помалку предвидлив, а исто така тоа е помалку предвидливо до кој степен Трамп ќе се држи до изјавите што ги даде за време на изборната кампања. Да почекаме и да видиме.”
На Украина ѝ требаат милијарди долари економска и воена поддршка секој месец за да продолжи да се бори против својот поголем и подобро опремен непријател, кој постигна значителен воен напредок во последните месеци. Трамп се пожали на трошоците на војната за американските даночни обврзници и истакна дека Украина можеби ќе треба да отстапи дел од својата територија, како што е Крим, за постигнување мир.
_06.jpg){kind=link}