Американскиот претседател Доналд Трамп повторно се закани дека ќе ги зголеми царините за стоките од Индија поради тоа што купува руска нафта. Њу Делхи, пак, го нарече неговиот напад неоправдан и вети дека ќе ги заштити своите економски интереси, продлабочувајќи го трговскиот јаз меѓу двете земји.

Во објава на социјалните мрежи, како што пренесува Ројтерс, Трамп напиша дека Индија не само што купува огромни количини руска нафта, туку потоа, голем дел од купената нафта, ја продава на отворениот пазар за голем профит.

„Не им е грижа колку луѓе во Украина се убиени од руската воена машинерија. Поради ова, значително ќе ја зголемам царината што ја плаќа Индија на САД“, додаде американскиот претседател.

Портпаролот на Министерството за надворешни работи на Индија изјави дека земјата ќе ги преземе сите потребни мерки за да ги заштити своите национални интереси и економска безбедност.

„Таргетирањето на Индија е неоправдано и неразумно“, додаде портпаролот.

Трамп изјави дека од петок ќе воведе нови санкции врз Русија, како и врз земјите што го купуваат нејзиниот извоз на енергија, освен ако Москва не преземе чекори за да ја заврши својата 3,5-годишна војна со Украина.

Рускиот претседател Владимир Путин, пак, не најави дека ќе го промени својот став и покрај рокот.

Во текот на викендот, два извори од индиската влада изјавија дека Индија ќе продолжи да купува нафта од Русија и покрај заканите на Трамп.

Индија се соочи со притисок од Западот да се дистанцира од Москва откако Русија ја нападна Украина на почетокот на 2022 година. Земјата е најголемиот купувач на поморска сурова нафта од Русија, увезувајќи околу 1,75 милиони барели дневно руска нафта од јануари до јуни оваа година, што е зголемување од еден отсто во споредба со пред една година. Њу Делхи се спротивстави, наведувајќи ги своите долгогодишни врски со Русија и економските потреби. Трамп веќе во јули објави царини од 25% за индискиот увоз, а американските претставници наведоа низа геополитички прашања што стојат на патот на трговскиот договор меѓу САД и Индија.

Трамп, исто така, ја нарече пошироката група на земји во развој БРИКС непријателски настроена кон Соединетите Американски Држави. Овие земји го отфрлија неговото обвинување, велејќи дека групата ги промовира интересите на своите членови и на земјите во развој во целина.