Американскиот претседател Доналд Трамп во вторникот упати жестоки закани до иранскиот врховен лидер Али Хамнеи, велејќи дека е „лесна мета“ и дека „трпението на САД се истрошува“, притоа барајќи од Техеран да капитулира во тековниот конфликт со Израел, пишува Си-Ен-Би-Си.
„Знаеме точно каде се крие таканаречениот ‘врховен лидер’“, напиша Трамп на својата социјална мрежа Truth Social.
„Тој е лесна мета, но е безбеден таму – нема да го елиминираме (убиеме!), барем не сега“, додаде тој.
„Но, не сакаме ракети да се испукуваат врз цивили или врз американски војници. Нашето трпение се истрошува“, напиша претседателот Трамп.
Во следна објава, Трамп јасно порача што очекува од Иран: „БЕЗУСЛОВНА КАПИТУЛАЦИЈА!“
— Donald J. Trump (@realDonaldTrump) June 17, 2025
Овие закани доаѓаат само два дена откако медиумите објавија дека Трамп наводно ставил вето на планот на Израел за атентат врз ајатолахот Хамнеи.
Израелскиот премиер Бенјамин Нетанјаху во понеделникот ги минимизираше извештаите за несогласувања со Трамп околу Хамнеи, изјавувајќи: „Не би брзал со заклучоци“.
Претходно, администрацијата на Трамп тврдеше дека САД не се директно вмешани во, како што го нарече Израел, „превентивниот напад врз Иран“ во петокот, што поттикна петдневна ракетна размена меѓу двете регионални сили.
Но, најновите изјави на Трамп покажуваат дека САД се подготвени барем да се заканат со директна воена интервенција во поддршка на обидите на Израел да го скрши Техеран.
Трамп треба да одржи состанок во Белата куќа во вторник, заедно со неговите водечки советници за национална безбедност, каде ќе се разговара за ситуацијата меѓу Израел и Иран.
Во понеделникот, Трамп ненадејно се врати во Вашингтон, по посетата на Канада каде присуствуваше на состанокот на Групата на седумте најразвиени земји (Г7).
Пред заминувањето, тој ја критикуваше Г7 за тоа што ја исфрлила Русија од групата во 2014 година поради анексијата на Крим.
Во претходна објава на социјалните мрежи, Трамп напиша: „Сега имаме целосна и тотална контрола над воздушниот простор на Иран“.
„Техеран имаше добри радари и друга одбранбена опрема, и тоа во голема количина, но тоа не може да се спореди со американската технологија, дизајнирана и произведена во САД“, додаде тој.
„Никој не го прави тоа подобро од старите добри САД“, напиша Трамп.
