Американскиот претседател Доналд Трамп изјави дека е „многу лут“ и „бесен“ поради ставот на претседателот на Руската федерација Владимир Путин кон можниот прекин на огнот во Украина, што претставува значителна промена во неговиот досегашен тон кон рускиот лидер.
Во телефонско интервју за NBC News, Трамп истакна дека доколку не успее да постигне договор со Русија за запирање на конфликтот, а ако процени дека вината е кај Москва, ќе воведе дополнителни царини од 25 до 50 отсто на извозот на руска нафта.
„Доколку купувате нафта од Русија, нема да можете да правите бизнис во САД“, предупреди Трамп.
Тој, исто така, го критикуваше Путин поради доведувањето во прашање на легитимноста на украинскиот претседател Володимир Зеленски, иако самиот Трамп претходно го нарече Зеленски „диктатор“.
На коментарите на Трамп одговори и Зеленски, кој во своето редовно обраќање порача дека „Русија не се грижи за дипломатијата“, истакнувајќи дека нападите врз Украина продолжуваат и покрај неодамнешните предлози од Вашингтон за прекин на огнот.
„Русија заслужува зголемен притисок – сите строги мерки што можат да ја ослабат нејзината способност да води војна“, додаде украинскиот претседател.
