Формирање центар за бесплатна правна помош за жртви од семејно насилство, општинска помош за поставување спомен-плочи на загинати бранители и цивили од воениот конфликт од 2001 година, мерки за заштита од загадување на воздухот. Ова се само дел од предлозите и од барања на тетовци кои денеска беа упатени до локалната самоуправа на форумот организиран од Националниот демократски институт.
Градоначалничката на Тетово, Теута Арифи, вели дека досега Општината има преземено повеќе мерки за заштита од аерозагадување, меѓу кои чистење јавни површини и улици, формирање на Јавно претпријатие „Градски паркинг“, со што ќе се реши проблемот со паркирањето во градот, кое значително придонесува за зголемена концетрација на загаден воздух.
Од Форумот на жени од Тетово, истакнаа дека Центарот за бесплатна правна помош за жртви од семејно насилство е можно да згасне, доколку истиот не добие финасиска помош од општинските власти, од каде одговорија дека подршката за центарот ќе зависи од општинскиот буџет предвиден за 2016 година.
На форумот, се покренаа и прашања за загинатите бранители и цивили од воениот конфликт од 2001 година, чии спомен-обележја постојано се уништуваат.
– Дали како точка нa дневен ред Општина Тетово планира да го разгледа прашањето за финансирање на спомен-плочите на загинатите од 2001 година, кои претходно се уништени, а имаме план повторно да ги направиме и поставиме – изјави претседателот на одборот на бранители, Марин Најдов.
Градоначалничката Арифи изјави дека граѓаните и здруженијата треба да се насочат кон решавање на реалните сегашни проблеми, кои ги тиштат сите, без разлика на нивната верска и национална определба.
Претседавачот на Советот на Општина Тетово, Исен Џемаили, смета дека потсетувањето на загинатите од 2001 година е важно прашање, на кое институциите треба да му обрнат внимание.
– Секоја иницијатива за загинатите од 2001 година, треба да се институционализира и да се даде поддршка. Тие плочи, доколку се постават, во иднина да бидат дел од урбанистичкиот план на Општината – изјави Џемаили.
Дадените предлози и барања на денешниот форум, како што рече градоначалничката Арифи, ќе бидат земени предвид од Општината, која во зависнот од финансиите, ќе одвои и средства за нивна реализација.
З.Д.
