Учениците од гимназијата „Кирил Пејчиновиќ“ од Тетово, кои следат настава на македонски јазик, и по речиси два месеци од почетокот на учебната година, учат во несоодветни услови во салата на зградата на Општина Тетово. Тие сè уште чекаат да се реновираат објектите на старото медицинско училиште, каде треба да го продолжат воспитно-образовниот процес.

– Тука нема услови за следење настава, немаме табли, во една просторија не нè собира сите, па мора да учиме со скратени часови – вели ученичка од гимназијата „Кирил Пејчиновиќ“.

Од секторот за образование во Општина Тетово, изјавија дека објектите на стара медицина, биле подолг период запуштени и на градежните работници им требало повеќе време за да ги реновираат.

– Зградите беа во руинирана состојба. Но, се надеваме дека реконструкцијата на една од зградите ќе биде завршена до крајот на неделава, а потоа веднаш ќе почнеме да ја реновираме втората зграда. Би требало и таа за кратко да биде готова и месецов конечно учениците да почнат да следат настава во овие објекти – изјави Ахмед Ќазими, раководител на секторот за јавни дејности при Општина Тетово.

Тетовските гимназијалци кои следат настава на македонски јазик, оваа учебна година ја почнаа со протестен марш, револтирани што властите подолг период не им обезбедуваат соодветни простории за учење. Тие изминативе неколку години учеа во зградата на Работничкиот универзитет и основното училиште „Гоце Делчев“, каде немаше соодветни услови за учење. По неколкудневните протести, Општина Тетово одлучи на гимназијалците да им ги отстапи објектите на старото медицинско училиште.