Повисоките тетовски населби се соочуваат со прекини во водоснабдувањето во текот на целото деноноќие. Велат дека мора секојдневно да полнат шишиња и буриња со вода, кај нивни роднини и пријатели што живеат во долниот дел на Тетово, каде вода има само неколку часа во текот на денот.
– Јас живеам во горниот дел на градот, ние немаме вода и зиме, но сега состојбата е катастрофална и сме принудени секојдневно да полниме вода – вели жител на градот.
Тетовци велат дека вообичаено е да нема вода во повисоките населби, но сега речиси во текот на целиот ден нема вода и во центарот на градот.
Од Јавното комунално претпријатие Тетово, велат дека поради нерационално користење на водата, градот се соочува со проблеми во водоснабдувањето.
– Водата во Тетово во овој период од годината, кога е многу топло, се користи за миење улици, за полевање бавчи и слично. Деновиве комуналните инспектори ќе излезат на терен и ќе почнат со изрекување соодветни казни за сите граѓани кои нерационално ја користат водата за пиење – вели Самедин Абедини, раководител на секторот за водовод и канализација при ЈКП Тетово.
Моменталната штедрост на планинските извори, од кои Тетово се снабдува со вода за пиење, изнесува 400 литри вода во секунда, што е доволно да се задоволат потребите на тетовци, во услови кога водата не се злоупотребува.
З.Д.