Македонската асоцијација на медиуми (МАН) не поддржува политички партии да предлагаат членови на ад хок телото за регулација, затоа што, според Ивона Талевска, тоа треба да го направат новинарските здруженија.
– ЗНМ како приврзок на СДСМ, под превезот на независни членови не успеа да издејствува да внесе свои претставници во ова тело. Затоа тие целосно излегоа од оваа приказна – вели Талевска.
Таа тврди дека МАН ќе делегира свои членови кога државата на конкурс ќе го побара тоа, а не политичките партии.
Насер Селмани, претседател на ЗНМ, денеска на својот фејсбук-профил напиша дека барале вистински реформи во медиумите, а потписниците на Договорот од Пржино испорачале политичка фарса.
„Уште еднаш повторувам дека нема да учествуваме во играта без граници на партиите“, напиша Селмани, на својот фејсбук-профил.
Инаку, новинарските организации на вчерашниот состанок со раководството на опозицискиот СДСМ категорично одбиле да учествуваат во консултациите за ад хок телото и во изборот на главен уредник на МТВ.
Заменик-претседателката на СДСМ, Радмила Шекеринска, разговарала со претставници на Советот на етика во медиумите (СЕМ), Синдикатот на новинари и медиумски работници (ССНМ), Македонскиот институт за медиуми (МИМ) за начинот и за концептот на избор на член во ад хок телото и на главен уредник на радиодифузниот сервис. На разговорите биле повикани претставници и од Здружението на новинари на Македонија (ЗНМ), но тие не биле присутни на состанокот.
