ТВ „24“ и ТВ „21“ не добија национална дозвола, радиото „Слободна Македонија“ згаснува,


Скопје, 4 мај, 2018 - 17:22 (META) 

На денешната седница на Советот на Агенцијата за аудио и аудиовизуелни медиумски услуги (ААВМУ) едногласно беше донесена одлуката да почне постапката за одземање на дозволата на радиото „Слободна Македонија“. Како што напомена претседателот на Советот, Лазо Петрушевски, останува можноста во законскиот рок од 15 дена откако радиодифузерот ќе ја добие одлуката, да преземе мерки за да ги исполни условите.

Но, како што рече Зоран Трајчевски, директор на ААВМУ, уште од 8 февруари годинава, кога се упатени првите предупредувања дека не се исполнува програмскиот концепт за кој е издадена дозволата за емитување, односно најмалку 40 отсто говорна програма, не е преземено речиси ништо, а од тогаш „ролетните во редакцијата се постојано спуштени“.

Истовремено, членовите на Советот едногласно донесоа одлука да не се издаде дозвола за национален дигитален терестријален мултиплекс, односно емитување преку етер на целата територија за телевизиите „24“ и „21“. Како причина за тоа се наведе препораката од студијата што според законската обврска ААВМУ ја нарачала од „Маркет Вижн“, односно, како што рече Трајчевски, заклучоците се дека во услови на намалување на маркетиншкиот колач како и стагнананта економска ситуација, не треба да се објави конкурс за доделување дозволи за национално емитување, односно да не се доделат дозволи на телевизиите.

Исто така едногласно, членовите на Советот на ААВМУ донесоа одлука да се додели дозвола за емитување програма преку кабел во регионот на општините Дебар, Центар Жупа и Маврово – Ростуше на Виктор Серафимов од Скопје. Според барањето, ќе станува збор за телевизија со претежно забавен општ формат, што ќе емитува преку јавна електронска комуникациска мрежа што не користи ограничен ресурс.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на Фондацијата Отворено општество – Македонија.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на Фондацијата Отворено општество – Македонија.


МНР се извини за „несоодветниот однос“ кон новинарот на „ТВ 21“


Скопје, 2 февруари, 2018 - 15:01 (META) 

На прес-конференциите во МНР, особено кога има меѓународни претставници каде нивната агенда го ограничува времето на настанот, објективно немаме можност да обезбедиме простор сите прашања да се постават на лице место, велат од Министерството за надворешни работи за вчерашниот настан кога службеник од МНР се обидел да го спречи новинарот на „ТВ 21“ да постави прашање на прес-конференцијата со Метју Нимиц.

„Вработените во службата за односи со јавност се задолжени за водење на прес-конференциите, што понекогаш подразбира адекватно одредување приоритет на редоследот на прашањата согласно праксата на МНР. Жалиме доколку тоа понекогаш предизвикува непријатности за домашните редакции, а особено се извинуваме што за време на последната прес-конференција, некој од вработените во службата за односи со јавност постапил несоодветно и предизвикал новинар да се чувствува непријатно при вршењето на своите задачи. Тоа не е наша намера, напротив, сакаме новинарите да го чувствуваат МНР како институција – партнер, која ги обезбедува најсоодветните услови за нивна работа. Во конкретниот случај, новинарот од редакцијата постави прашање на кое што му беше одговорено, при тоа, земајќи збор на новинар од странски медиум кој што веќе поставуваше прашање, што во секој случај не е оправдување за нашата грешка“, велат од Министерството.

Во соопштението се вели дека од МНР се обратиле до главниот и одговорен уредник на редакцијата за да се извинат за ситуацијата.

Од таму додаваат дека ја разгледуваат можноста да го ревидираат системот на давање збор на прес-конфренции, за како што велат, поефикасно искористување на времето поставено за прашања.

„Во комуникација сме со редакциите како и со релевантните новинарски здруженија, со кои работиме на тоа да овозможиме уште подобра работна атмосфера. Тоа е процес во кој сите предлози се добредојдени и бараат професионализам и посветеност од сите засегнати страни“, додаваат од МНР.


СЕММ ги осуди заканите на службеник на МНР кон новинар на „ТВ 21“


Скопје, 2 февруари, 2018 - 11:22 (META) 

Советот за етика во медиумите на Макединија (СЕММ) го осуди однесувањето на претставник на Министерството за надворешни работи, кој на вчерашната прес-конфернеција на медијаторот, Метју Нимиц се обидел да го спречи новинарот на „ТВ 21“, Фуркан Салиу да постави прашање, како и заканите за одземање на неговата акредитација.

„За СЕММ е целосно неприфатливо на каков и да е начин да се спречува професионалната работа на новинарите, која треба да биде ослободена од какви било закани и притисоци. Советот за етика го повикува МНР да ги преземе неопходните мерки за да го расчисти случајот и да спречи повторување на ваквите инциденти. Упатувањето какви било закани кон новинарите од страна на институциите не смее да биде метод со кој ќе се спречува известувањето за теми и прашања од интерес на јавноста“, стои во соопштението.

Од СЕММ потсетуваат на членот 10 од Европската конвенција за човекови права, според кој новинарите мора да биде ослободени од какви било закани и притисоци, а државата е одговорна за преземање на сите активни мерки со цел да се создаде и одржува поволна клима за слобода на изразување.


Димитров: Го охрабривме Нимиц в среда да излезе со првичен предлог за името


Скопје, 13 јануари, 2018 - 16:03 (META) 

Министерот за надворешни работи Никола Димитров велии дека се уште нема предлог за решавање на спорот со името, но медијаторот Метју Нимиц бил поттикнат од македонската страна да излезе со првична рамка уште следната недела.

– Сè уште немаме предлог на масата за решавање на спорот со името. Одлучивме да го охрабриме медијаторот Метју Нимиц да излезе што е можно побрзо, дури и идната среда, со една првична рамка што ќе послужи или што ќе даде насоки за суштински напредок и најавивме подготвеност да се вклучиме како шефови на дипломатии директно, нешто што досега не се случило – изјави шефот на македонската дипломатија Никола Димитров во синоќешното интервју за ТВ 21.

Според него, не може Македонија да биде само грчка, бидејќи географскиот регион е голем и има три држави.


Внатрешната контрола на МВР негира дека обезбедувањето на Груевски упаднало во „ТВ 21“


Скопје, 18 јули, 2016 - 16:31 (META) 

Личното обезбедување на поранешниот премиер Никола Груевски не влегло во дворот на „ТВ 21“ и не му наложило на новинарот Кристијан Ландов да избрише снимки од мобилниот телефон. Ова било наведено во одговорот на Секторот за внатрешни контрола и професионални стандарди на Министерството за внатрешни работи на барањето на Здружението на новинарите на Македонија (ЗНМ) да биде поведена дисциплинска постапка против двајца припадници на обезбедувањето на Груевски, кои на 17 јуни годинава без налог упаднаа во телевизијата.

„МВР во краткиот допис до ЗНМ нè извести дека извршиле проверки, но при тоа не успеале да обезбедат докази со кои ќе се потврдат наводите дека обезбедувањето на Груевски влегло во дворот на „ТВ 21“ и му наложило на новинарот да ги избрише од телефон снимките со експремиерот Груевски како поминува на улица Македонија. Освен тоа, МВР го известило и Основното јавно обвинителство во Скопје за констатираната состојба. Со тоа полицијата му укажува на обвинителството да не поведе какво било постапка против нејзини припадници затоа што таков инцидент не се случил, иако безбедносните камери на телевизијата јасно го имаат регистрирано целиот настан, а новинарот и раководството на телевизијата го пријавиле инцидентот и бараат одговор од полицијата за неовластеното влегување во нивните простории“, стои во соопштението од ЗНМ.

Оттаму додаваат дека ЗНМ упадот го оцени како „директен напад врз слободата на медиумите затоа што полицијата нема право да ги спречи новинарите на јавен простор да го снимаат поранешен премиер и лидер на владејачката партија“.


ЗНМ бара МВР да го казни обезбедувањето на Груевски за упадот во „ТВ 21“


Скопје, 21 јуни, 2016 - 18:19 (META) 

Здружението на новинарите на Македонија (ЗНМ) денеска доставило претставка до Секторот за внатрешна контрола и професионални стандарди на Министерството за внатрешни работи за упадот на обезбедувањето на лидерот на ВМРО-ДПМНЕ, Никола Груевски, во „ТВ 21“.

Во претставката, ЗНМ бара да биде поведена постапка против двајцата припадници на обезбедувањето на Груевски, кои минатата недела упаднаа во просториите на телевизијата и го присилија новинарот Кристијан Ландов да избрише снимки од мобилен телефон.

„ЗНМ бара МВР да ги утврди сите околности на настанот и најостро да ги казни припадниците на обезбедувањето на Груевски за незаконско и непрофесионално постапување“, стои во соопштението на ЗНМ.

Оттаму велат дека бришењето снимки на новинари е чин на цензура, која е забранета со Уставот и потсетуваат дека Груевски како лидер на политичка партија е јавна личност и новинарите имаат право да го снимаат.

„Никој нема право, па и припадници на полицијата, да одземат приватен мобилен телефон од новинар или да му наложат да избрише снимен материјал надвор од судска постапка. Ако Груевски сметал дека новинарот му ја нарушил неговата приватност, можел да поднесе соодветна пријава до надлежен суд, но во никој случај вашите припадници не смееле да упаднат во телевизијата и да му наредат на новинарот да ја избрише снимката“, наведуваат од ЗНМ во претставката до МВР.