Перформанс пред Владата: Заслужуваме подобро


Скопје, 1 декември, 2015 - 12:12 (META) 

Коалицијата „Граѓаните за Македонија“ одржа протестен перформанс – фотографирање со големи букви кои ги држеа нивните активисти и заедно направија голем натпис „Заслужуваме подобро“.

Од платформата велат дека граѓаните имаат право да ги контролираат политичарите, да ја знаат нивната имотна состојба и да бидат прашани како се трошат нивните пари. Тие сметаат дека граѓаните заслужуваат јавните пари да се користат за нивните вистинските потреби, а не за споменици, бронзени огради, „мерцедеси“ и за патувања.

„Не заслужуваме власт која ги задолжува нашите деца и внуци. Не заслужуваме власт која неодговорно троши на чоколада, кога немаме ни за леб. Од 2006 година досега, власта нè задолжила повеќе од 4 милијарди долари. Кој ќе ги враќа овие пари? Затоа, бараме власт која нема да троши на луксуз, туку ќе се бори против немаштијата. Бараме одговорност од власта за сè што е украдено од граѓаните, а украдените пари да им ги вратат назад на граѓаните. Во Македонија предолго ги толерираме корумпираните политичари. Бараме корупцијата да не биде исплатлива дејност. Бараме политичарите да не се чувствуваат сигурно и да одговараат доколку крадат, лажат и се корумпирани“, велат од „Граѓаните за Македонија“.

Активистите побараа институциите да функционираат и да се борат против корупцијата, а квалитетот на услугите на институциите да не зависи од подмитување и од партиски притисоци.


Заев се сретна со коалицијата „Граѓаните за Македонија“


Скопје, 17 јули, 2015 - 10:43 (META) 

Граѓанските организации од коалицијата „Граѓаните за Македонија“ вчера остварија средба со претседателот на СДСМ, Зоран Заев, пишува „А1 он“ (а1on.mk).

Невладиниот и граѓанскиот сектор беа информирани од претседателот на СДСМ, Заев, за деталите од исходот на преговарачкиот процес.

Заклучено е дека со договорот од Пржино успешно е заокружена една важна фаза од заедничката акција за заштита на достоинството на граѓаните и на Уставот на Република Македонија.

Членовите и поддржувачите на коалицијата „Граѓаните за Македонија“ ги разгледаа следните чекори за обезбедување демократичност во нашето општество и во таа насока е договорено продолжување на меѓусебната комуникација и координација.

Коалицијата „Граѓаните за Македонија“ се заблагодари на сите граѓани, активисти, експерти, аналитичари, музичари, изведувачи кои учествуваа во организирање на содржините во „Кампот на слободата“ што беше поставен 60 дена пред Владата.