Министерот за транспорт и врски, Горан Сугарески очекува до крајот на годинава општините да ги завршат проектите со кои доцнат за изградба на водоводна и канализациска инфраструктура.
Одговарајќи на новинарски прашања, тој изјави дека е жално што во 21 век се уште се зборува за изградба на водоводи и канализации за кои, како што вели, процентот на изградба е многу мал.
„Единствена алатка е да продолжат разговорите со општините за да го забрзаат процесот. Еден дел веќе почнаа да работат, но тоа не е баш мал процес, мора да помине време, проктот се одобрува во Министерството за транспорт и врски и во ЕИБ. Не се намалени дел од средствата за кои се шпекулираше во јавноста, туку се префрлени за наредната година. Тие пари не се допрени и ќе се користат во текот на наредната година. Очекувам до крај на годината да бидат донесени сите проекти“, изјави Сугарески кој денеска присуствуваше на стартот на градежните работи за канализација на улица Петричка во Маџир мало во Општина Центар.
Преку Министерството за транспорт и врски се реализираат 20 проекти за комуналната инфраструктура, а уште 10 треба да почнат во наредниот период.
– За дел од проектите ќе бидат распишани тендери во наредниот период и очекуваме во октомври – ноември да почне изградбата на тие водоводи и канализациски системи. Ќе продолжиме со изградба, како од буџетот, така и со уште еден кредит од Европската инвестициска банка за конечно во наредните две години да ги решиме најголемиот дел од проблемите. Процентот на канализациски систем во изминатиот период беше многу низок и се посветувало многу малку време. Жално е што во 21 век уште разговараме за ова, но еднаш мора да се стави крај и да се решат овие елементарни проблеми – изјави Сугарески.
Немањето на проекти од страна на општините, беше причина планираните пари за таа намена од кредитот од Европската инвестициска банка да бидат префрлени за користење во наредната година со предложениот ребаланс на буџетот.
