Аналитичарот Суад Мисини денеска почна штрајк со глад пред Собранието на Република Македонија, што, како што рекол за „Нова ТВ“, ќе трае сè додека надлежните не ги донесат потребните законски измени и не го решат проблемот со мигрантите во земјава.
– Барам итно донесување на законските измени со кои ќе се овозможи безбеден транзит или привремен престој на мигрантите во Македонија, да им се овозможи непречено движење и користење јавен транспорт. Исто така, барам МВР јавно да ги објави мерките што ќе ги спроведе за да ги заштити мигрантите додека се на територијата на Република Македонија, односно да гарантира дека ќе го заштити физичкиот интегритет на мигрантите и ќе се справи со криминалците што ги малтретираат, убиваат и силуваат. Трето, веднаш безусловно да се ослободат мигрантите што се сместени во Гази Баба и затварање на центарот, бидејќи таму не постојат минимални услови за живот и тој центар оди на штета на имиџот на нашата држава во странство – изјавил Мисини за „Нова ТВ“.
