Студентите што не го оствариле правото на субвенциониран оброк досега, можат да аплицираат на новиот повик

Илустрација: Мета.мк

Студентите што досега не го оствариле правото на субвенциониран студентски оброк можат тоа да го сторат преку аплицирање на новиот јавен повик што Министерството за образование и наука (МОН) го објави вчера.

Конкурсот е достапен во системот „е-услуги“ на МОН и е отворен до 31 јануари, односно до вторник. Во делот „Конкурси – Образование“ може да се најдат повиците за секој универзитет посебно.

На повикот може да се пријават сите редовни студенти на додипломски студии на државните и приватните високообразовни установи кои се државјани на Република Северна Македонија. Притоа, апликантите треба да ги исполнат и условите: да не се во редовен работен однос, да не се регистрирани како индивидуални земјоделци и да немаат месечен приход по кој било основ поголем од минималната нето-плата во тековната година.

Потребните обрасци за аплицирање студентите можат да ги најдат во претходно објавениот повик на интернет-страницата на МОН, а Министерството по службена должност ќе ги обезбеди сите останати докази за исполнување на условите, кои ги поседуваат другите институции како МВР, АВРМ, УЈП и факултетите.

Инаку, студентите што го оствариле правото на субвенциониран студентски оброк ги очекуваат субвенциите за декември. Министерството минатата седмица соопшти дека средствата по овој основ ќе бидат исплатени до крајот на месецот.

МОН: Ученичките и студентските стипендии и субвенциите за оброк ќе бидат исплатени до крајот на јануари