Неколку професори од светски реномирани универзитети им пишаа писмо на студентите од неформалната студентска организација „Студентски пленум“ во знак на поддршка за студентските протести против воведување државен испит на факултетите.

„Кога институциите на високото образование стануваат предмет на контрола на државата, критичкото размислување е заложник на диктатот на оние на власт. Едно општество не може да се развива во такви услови. Креативноста е задушена, критиката е замолчена, независната мисла е укината. Предложените измени и дополнувања на Законот за високото образование, во прилог на други неодамнешни активности на Министерството за образование и наука, не само што ја поткопаа автономијата на универзитетите, туку и ја елиминираа“, се вели во писмото.

На крајот од писмото, професорите упатуваат барање до Министерството за образование и наука да се откаже од својот обид да се елиминира автономијата на универзитетите и да им се врати контролата на тие што едуцираат и на тие што се едуцираат во нив.