Студентите од „Студентски пленум“ побараа став од ректорот на Универзитетот „Св.Кирил и Методиј“, Велимир Стојковски, за изградбата на двата нови факултети во кампусот на УКИМ, за кои е предвидено да бидат во барокен стил.
Тие објавија фотографија на нивниот фејсбук-профил, со која го повикуваат ректорот да каже свој став по ова прашање.
Студентите вчера одржаа трибина по повод сечата на дрвјата и подготовка на теренот кај УКИМ за изградба на факултет за физичка култура и факултет за информатички науки и компјутерско инжинерство.
Од „Студентски пленум“ велат дека одлуката за изградба на овие две нови факултетски згради е проблематична од повеќе аспекти.
– Според наши сознанија, Сенатот воопшто не донел одлука за градење нови објекти кај кампусот на УКИМ. Со тоа сметаме дека наметнатата одлука за изградба на овие објекти е упад во универзитетската автономија. Второ, проблематична е и локацијата бидејќи самиот кампус има проблеми со бројот на студенти. Ако се додадат и студентите во двете нови згради, би се влошила сообраќајната состојба и би се уништил голем дел од зелената површина и дрвјата околу факултетите – изјави Орхан Сулејмани од „Студентски пленум“.