Неколку стотини граѓани денеска се собраа пред Собранието на Република Македонија на протест против најавениот предлог-закон за забрана на објавување на прислушуваните материјали и порачаа „Стоп за цензурата“ и „Не ги даваме бомбите“. Демонстрантите протестот го одбележаа со тоа што на разглас пуштаа дел од „бомбите“ што ги објавуваше лидерот на СДСМ, Зоран Заев.
Билјана Бејкова од Граѓанската платформа „Ајде“ рече дека „бомбите“ се сведоштво за тоа како власта прислушувала и ја нарушувала приватноста на голем број граѓани.
– Овој закон е неуставен и со него сакаат да го скријат тоа што го направиле. Законот мора да биде повлечен и ќе протестираме сè додека не го направат тоа. Оваа држава мора да биде демократска и граѓаните да бидат слободни – рече Бејкова.
Павле Богоевски од „Ајде“ рече дека членот 16 од Уставот ја забранува цензурата, а со овој Закон, цензурата ќе стане законска.
– Овој народ има глас, има мозок, има душа и нема да им ја земете. Нема да ви помине – порача Богоевски.
Јадранка Костова, главен и одговорен уредник на „Фокус“, смета дека доколку помине овој закон, кој, според неа, има небулозни одредби, срамот ќе го носиме сите, а особено оние кои ќе го потпишат.
– Ова е небулозен закон и е опасен по сите демократски тенденции. Ако идејата е да се забрани објавување на нови „бомби“ е едно, сè друго е невидена глупост и голем срам за Македонија – рече Костова.
