Генералниот секретар на НАТО, Јенс Столтенберг по средбата со македонскиот претседател, Стево Пендаровски во Брисел изјави дека шпекулациите кои произлегоа од наводните нон-пејпери за прекројување на границите на Западниот Балкан не помагаат за стабилноста.
„Не е на мене да коментирам нешто што не сум го видел или прочитал но секоја шпекулација за промена на граници само ќе донесе повеќе неизвесност и нестабилност во регионот, шпекулациите не се од помош“, изјави Столтенберг.
И претседателот Пендаровски порача дека и во минатото предупредил против вакви опасни идеи на поделба по етничка линија во регионот и увери дека ниеден од неговите соговорници во ЕУ или во НАТО не поддржува вакви концепти какви што содржат наводните нон-пејпери.
На денешната средба меѓу Пендаровски и Столтенберг било дискутирано за соработката меѓу Република Северна Македонија и НАТО Алијансата, за актуелните регионални и безбедносни прашања, за надворешно-политичките приоритети на земјава и за можностите за продлабочување на соработката во справување со последиците од глобалната пандемија на ковид-19.
Претседателот Пендаровски во разговорот со генералниот секретар Столтенберг ја реафирмираше подготвеноста и посветеноста на Република Северна Македонија во промовирање на мирот и стабилноста, истакнувајќи дека земјава и во иднина активно ќе придонесува во меѓународните мировни мисии предводени од НАТО во регионот и пошироко, информираат од Кабинетот на Претседателот на РСМ.
„Ова е моја прва посета на НАТО како Претседател на Република Северна Македонија. Неодамна, на 27 март, ја одбележавме првата годишнина од нашето членство во НАТО. Ни требаа многу години, донесовме многу тешки одлуки, но бевме упорни во остварувањето на нашата стратешка цел. Веруваме дека членството во НАТО е многу важно за одржување на безбедноста и стабилноста како предуслов за просперитет и зајакнување на демократските институции“, изјави претседателот Пендаровски по средбата со Столтенберг.
