Вкупната вредност на стоковата размена на Македонија со странство, во јануари 2016 година, изнесува 694.140.000 долари и бележи пад од 8,6 отсто во однос на истиот период минатата година, покажуваат податоците на Државниот завод за статистика.
Вкупната вредност на извозот на стоки во јануари 2016 година, изнесува 309.706.000 долари и бележи пад од 7,9 отсто во однос на истиот период од минатата година. Вкупната вредност на увeзената стока, во истиот период, изнесува 384.434 .000 долари, што е за 9,1 отсто помалку во споредба со истиот период од минатата година.
Трговскиот дефицит, во јануари 2016 година, изнесува 74.727.000 долари, што претставува намалување за 14 отсто во однос на истиот период од минатата година. Покриеноста на увозот со извоз, во јануари 2016, изнесува 80,6 отсто.
Трговската размена по производи покажува дека во извозот најголемо е учеството на катализаторите на носачи со благородни метали или нивни соединенија, сетовите на проводници за палење и слично, за возила, авиони или бродови, фероникелот, производите од железо и од челик.
Во увозот најмногу се застапени платината и легурите на платина, необработени или во прав, нафтените масла и маслата добиени од битуменозни минерали (освен сурови), електричната енергија и другите метали од платинската група и нивни легури, необработени или во облик на прав.
