Американскиот Стејт департмент денеска соопшти дека САД заедно со НАТО и со ЕУ одблизу го следат процесот на формирање влада во Македонија, по парламентарните избори одржани на 11 декември 2016 година.
„САД ги повикуваат македонските лидери да формираат нова влада без понатамошно одложување, на начин во согласност со Уставот и со аспирациите на Македонија за влез во Европската Унија и во НАТО. Формирањето нова влада која е посветена на владеењето на правото и на имплементирањето на потребните реформи, ќе помогне за ставање крај на политичката криза која сериозно ги попречува демократскиот и економскиот развој и евроатланската интеграција на земјата“, стои во соопштението.
Од Стејт департментот повторно апелираа до политичките партии на прво место да ги стават интересите на Македонија и на граѓаните.
„САД ги повикуваат сите партии да го стават интересот на Македонија и на нејзините граѓани пред сè друго, да работат конструктивно и за целосно спроведување на нивните обврски, преземени со Договорот од Пржино“, се вели во соопштението.
