Сите граѓани кои имаат возачки дозволи со старото име на државава да пристапат кон обновување на истите, апелираше утрово министерот за внатрешни работи Панче Тошковски.
Тој во изјава за медиумите рече дека во наредните денови Министерството за внатрешни работи (МВР) преку кампања ќе ги повикува граѓаните што не ги обновиле возачките дозволи, да извадат нови со уставното име.
„Досега се издадени 750.000 возачки дозволи со новото уставно име. Потребно е да се издадат уште околу милион возачки дозволи со новото име. Ги замолувам во наредниот период од неколку месеци сите оние кои имаат возачки дозволи со старото име да пристапат кон обновување на истата, затоа што согласно измените на законот, старите возачки дозволи ќе важат до крајот на оваа година“, изјави Тошковски.
Министерот тврди дека нема повеќе гужви и оти издавањето на документите е вратено во нормала.
„Од оваа недела натаму, секој граѓанин којшто ќе поднесе барање за да се стекне со нова патна исправа, возачка дозвола, лична карта, ќе може да ги оствари во рамки на законското право во рок од 15 дена“, рече Тошковски.
