Самостојниот синдикат на новинари и медиумски работници (ССНМ) изрази жалење поради одлуката на Медиумската информативна агенција (МИА) за ставање во мирување на неопределено време на дописништвата во Брисел, Атина и Вашингтон, како и за најавите за непродолжување на договорите за соработка на дописниците од другите европски градови.
Од ССНМ сметаат дека не смее да биде дозволено државна новинска агенција како што е МИА да нема свои дописници во едни од најважните главни градови во светот, особено во период на комплицирани и предизвикувачки меѓународни односи.
„Свесни сме за економската криза, односно за мерките за штедење кои беа наметнати на државните институции и претпријатија, меѓутоа се надеваме дека ќе се направат напори и ќе се изнајдат начини во најкус можен рок дописништвата да не престанат со работа“, стои во реакцијата на ССНМ.
Од Синдикатот потенцираат дека е особено важно македонските граѓани да бидат објективно и навремено информирани директно од новинари кои се на местото на случувањата, особено за процеси како што се пристапувањето кон Европската Унија (ЕУ), како во Брисел, така и во другите главни градови на земјите-членки на ЕУ.
„Со ваквата одлука на МИА предизвикана од одлуката на Владата за штедење директно се влијае и на несигурноста на работните места на новинарите и медиумските работници, но и врз стандардите и нормите за објективно и професионално известување за случувањата во светот“, реагира Самостојниот синдикат, од каде ја повикаа Владата, како основач на МИА и контролор на нејзината работа, да води грижа за присутноста на државната новинска агенција во важните светски центри.